719 recollectiones in totius anni solennioribus festis 3. “Reclinavit eum in praesepio” (Lc 2[, 7]). Considera admirandum fuisse spectaculum, quod universi totius Dominus, in stabulo natus recubaret: ast maius est istud, quod idem hodie tuo in pectore manet. In stabulo foetores erant sordium; in tuo pectore sordes peccatorum. Ibi durum faenum pro Infante, hic durum cor pro Redemptore. Ibi bos et asinus non expertes gratitudinis assistebant; hic tepiditas, oscitatio, dissolutio, vagantur. Ibi concentus aderat [f.147v] angelorum laudes psallentium; hic nullus auditur linguae sonus grates peragentis. Ibi Maria osculabatur, Iosephus venerabatur; hic nulla adfectus, nulla reverentiae signa comparent. O vere, tu, stabulum foetidum es! Ah miser! pete cum lachrymis Deum, ut, qui hodie hominis assumpsit effigiem, det tibi formam Dei. In Eadem Festivitate Recollectio II Ante Sanctissimam Communionem 1. “Erunt prava in directa, et aspera in vias planas” (Is 40[, 4]). Considera, quod, qua ratione malae viae, regibus dynastisque per eas transituris apparantur, ea tibi viam cordis reparandam adornandamque esse, cum ad te parvulus quidem recens natus, sed super cuius humerum Principatus factus est; cuius nomen admirabilis, consiliarius, Deus fortis, Pater futuri saeculi, Princeps pacis; cum, inquam, ad [te] Regum Rex advenit. Fac ergo prava in directa, et aspera in vias planas. Quodsi hoc propriis viribus nequis efficere, roga eundem ipsummet Regum Regem, ut, siquidem est admirabilis, admirabilem metamorphosim viarum tuarum faciat; siquidem est consiliarius, non solum consilio ad omne malum fugiendum et bonum amplectendum, ad perditionem evitandam, salutem consequendam, sed etiam vi, tanquam Deus fortis, impellat et cogat. Iam si Patris futuri saeculi gaudet nomine, petes ab eo humillimis precibus, ut te in album filiorum suorum dignetur inscribere,
RkJQdWJsaXNoZXIy MjI2Mw==