682 inspectio cordis non ex propria facias voluntate, sed ex ordinatione Dei, puta ex obedientiae mandato. Alterum est, quod consideres: Hebraeorum nempe fuisse plurimos, qui nec minis adduci poterant nec blanditiis, ut in gentili terra deos gentium colerent, aut a suis ritibus ac legibus desciscerent; nec defuisse illis divinum ad eam rem perficiendam auxilium fuisseque tres pueros a flamma praeservatos78, Danielem a rabie dentibusque leonum defensum79 eo quod constanter patriis legibus adhaeserint. Ita, te spera Dei curam, providentiam, tutelamque comitaturam, quoties vel ob communitatis negotium, vel ob salutem proximi extra Religiosa septa Babylonem fueris ingressus, modo ibi divinarum, cummuniumque legum memor sis et statuam Nabuchodonosor non adores80, prohibitisque carnibus abstineas. 2. “Et post transmigrationem Babylonis” [Mt 1, 12]. Expende, Hebraeos, quamprimum e Babylonica fuere liberati captivitate in Iudaeamque venere, primum lapidem movisse, ut Dei laus et cultus in omni [f.134r] populo excitaretur templumque Domini restauraretur, quin a fundamentis erigeretur Ierosolymis: “Surrexerunt principes patrum de Iuda, et Beniamin, et Sacerdotes, et Levitae, et omnis, cuius Deus suscitavit spiritum, ut ascenderent ad aedificandum templum Domini, quod erat in Ierusalem” (1 Esd 1[, 5]). Pariter agendum tibi est, quoties redis Babylone, per quam designatur mundus; renovandus tibi scilicet spiritus et anima resarcienda tot fluctibus mundanarum tempestatum si non lacerata, saltem concussa. Quanquam illud etiam hinc tibi discendum occurrit, ut, omnibus postpositis, in quavis re divinorum honorem promoveas et si forte ab aliquo impediaris, non desistas; sicut opus Hebraeorum nequaquam disiecit impietas gentilium trans flumen habitantium, cum his illi fortiter resisterent et aedificationem templi non intermitterent. 78 Cf. Dan 3, 19-95. 79 Cf. Dan 6, 16-23. 80 Cf. Dan 3, 17.
RkJQdWJsaXNoZXIy MjI2Mw==