603 recollectiones in totius anni solennioribus festis 2. “Quis es, Domine? ” [Act 9, 5]. Sapientis hominis est, volentis converti animae est, super instinctus bonos inquirere eosque amplecti, exequi. Tu vero divinas inspirationes negliges? tu, cum tibi veniet a Domino immissa cogitatio exempli gratia haec vel similis: “Surge, qui dormis” [Eph 5, 14], “qui tot imperfectionum somno oppressus es”, an non expergisceris? an te non proripies? an non dices ingemiscens: “Vere Dominus locutus est”? “Surgam”, itaque, “et circuibo civitatem, per vicos et plateas quaeram quem diligit anima mea” [Cant 3, 2]; et tanto instantius inventum tenebo, quanto tardius quaerere incipio. 3. “Domine, quid me vis facere? ” [Act 9, 6]. En quam cito Saulus transit in Paulum abiicit suam, divinam inquirit voluntatem; non vult amplius Christum persequi, vult sequi. O te felicissimum! si hodie tam generosa habeas proposita abnegandi te! si ex carnali vertaris in spiritualem! si Iesum persequi desistas, sequi incipias! si dicas ex corde: “Domine, quid me vis facere?” Dicis? [f.102v] Inquiris? Ergo, “Surge, et ingredere civitatem, et ibi dicetur tibi quid te oporteat facere” [ibid.]. Descende, inquam, ad ipsam animam tuam, et tibi ex Deo illam visitante disces, quid facturus sis, quam vitae methodum initurus, qua ratione passiones eradicaturus, virtutes plantaturus: per abnegationem nempe propriae voluntatis. Post Sanctissimam Communionem 1. “Surrexit autem Saulus de terra” [Act 9, 8]. Certe de terra surrexit Saulus, non enim amplius terrena desideria sectatus est. Imo alios quoque de terra elevans inquit: “Obsecro [...] vos fratres per misericordiam Dei, ut exhibeatis corpora vestra hostiam viventem, sanctam, Deo placentem, rationabile obsequium vestrum. Et nolite conformari huic saeculo, sed reformamini in novitate sensus vestri: ut probetis, quae sit voluntas Dei bona, et beneplacens, et perfecta” (Rom 12[, 12]). Ecce, quae voces illius sunt, qui de terra vere surrexit, qui ad tertium caelum raptus est.
RkJQdWJsaXNoZXIy MjI2Mw==