613 recollectiones in totius anni solennioribus festis 2. “Et si venerit in secunda vigilia” [Lc 12, 38]. Considera, continuum fervorem et maiorem cum tempore in virtutibus requiri a te progressum. Nam quis esset tam imprudens imperator, qui militem initio tantum militiae bonum, laboriosum, obsequentem, sed deinceps dissolutum praemio cumulet? Deus, volens te aeterna mercede afficere, vult ut perpetuum vigiles, ferveas, labores, proficias. [f.106v] Neque decorum, non modo non meritorium, est, militem Dei principio fervere, tentationes propulsare fortiter, in omni genere mortificationis orationisque, in omnis virtutis actu sese exercere strenue, paulo post deficere et quasi victis vinctisque manibus hosti palmam porrigere26. Ad maiores ergo te labores praepara, ad graviores tentationes, ad continuas desolationes: siquidem ad perfectam beatitudinem spectat, ut in prima vigilia, hoc est religioso tyrocinio et in secunda, id est post professionem et demum in tertia vigilia, nempe prope obitum, declinante iam ad occasum aetate, vigilans inveniaris. 3. “Hoc autem scitote” [(Lc 12, 39]. Considera Divinum Verbum, multoties parabolis usum, hanc non parvi momenti protulisse, de fure, patreque familias: qua nos docet, ut nunquam non parati simus ad supremam diem obeundam. Cum enim, teste patientissimo sapientissimoque Iobo: “Militia est vita hominis super terram” [Iob 7, 1]; semper est nobis manendum in excubiis. Quod caelestis Magister declarat, introducens patremfamilias; qui tota utique nocte somno non sese permitteret obrui, si furis adventum ad fodiendam suam domum non ignoraret. Proinde, veluti mortales ob amissionem temporalium bonorum diu noctuque vigilare fas est, sic te omni momento attentum esse oportet, ne bona donaque immortalia perdas ac inanis meritorum a morte deprehendaris. 26 “Ponitur saepe palma pro victoria” (SLL, s.v. Palma, ubi cause datur).
RkJQdWJsaXNoZXIy MjI2Mw==