-635CAPITULUM GENERALE VIII - SPECIALE ROMANUM V anni 1969 et 1970 I. Litterae Circulares de convocatione Capituli Generali Speciali a. 1969 celebrandi Ad Reverendissimos Patres Superiores Provinciales, Locales omnesque Congregationis CC. RR. Marianorum Sodales. Dilectissimi, ad finem vertente tempore pro quo electum est anno 1963 Regimen Centrale Provinciarumque nostrarum, praesentibus litteris, iuxta Decreta Oecumenici Concilii Vaticani Secundi et ad normam nostrarum Constitutionum, convocamus de consensu nostri Consilii Capitulum Generale Speciale Romae, a die 12 Maii 1969, celebrandum. Capitulares Romam venire faveant duobus vel uno saltem die ante Capituli initium, non tardius tamen quam die 11 Maii 1969. Superiores Provinciales curent, ut in Provinciis sibi concreditis tempestive Capitula Localia et Provincialia convocentur eliganturque delegati ad Capitulum Generale Speciale et ut materia, renovationem Congregationis nostrae respiciens, simul cum aliis negotiis tractetur. Si aliqua decisio quoad proportionalem electionem delegatorum pro Capitulis Provincialibus et Generali a Consilio nostro et a S. Sede approbata haberetur, omnes quorum interest certiores de ea reddantur. Cum vero Capitula Provincialia duobus saltem mensibus Capitulum Generale Speciale praecedere debeant, hisce decernitur quod ad Capitula Provincialia habenda procedendum est modo a Constitutionibus nostris praescripto, nisi ante diem 12 Ianuarii 1969 alia a nobis instructio daretur. Celebrationem Capituli Generalis maximi momenti esse, nemo est qui non videt. Hac tamen vice, cum Congregatio nostra, simul cum tota Ecclesia, ad renovationem strenuam tendit, omnes invitantur, ut studiis, labore orationibusque hoc proximum Capitulum, quod speciale vocatur, adiuvent. Ad copiosam et abundantem Benedictionem Divinam impetrandam, de consensu Consilii nostri, numero 638 Constitutionum praescripto, omnibus Domibus ac singulis Ritus Latini sodalibus imponimus obligationem recitandi initio precum vespertinarum loco "Veni Sancte Spiritus", hymnum "Veni Creator Spiritus", in fine vero earundem precum Orationem pro Congregatione et unum "Pater", "Ave" et "Gloria"; pro sodalibus autem Ritus Orientalis, tempore ab eis statuto, semel quotidie orationem "Caru niebiesny", "Tnsagion" et "Dostojno jest". Obligatio haec incipitur a die 8 Decembris 1968 et durat usque ad finem Capituli Generalis Specialis. Benedictio Dei Omnipotentis, Beatissima Virgine Maria Immaculate Concepta intercedente Sanctisque Patronis Congregationis nostrae adiuvantibus, descendat
RkJQdWJsaXNoZXIy MjI2Mw==